Ռուսաստանն արգելել է ալկոհոլի, մրգի, շոկոլադի և մի շարք այլ ապրանքների ներկրումն Ուկրաինայից:

Ռուսաստան արգելք է սահմանել Ուկրաինայից մի շարք պարենային ապրանքների և հումքի ներկրման համար: BBC-ի փոխանցմամբ՝ արգելված ապրանքների ցանկում ընդգրկվել են, մասնավորապես, գարեջուրը, բանջարեղենը, մրգերը և քաղցրավենիքը:

Համապատասխան փաստաթուղթը հրապարակվել է ՌԴ կառավարության կայքում: «Ռուսաստանն արգելք է սահմանում մի շարք ուկրաինական ապրանքների համար: Սա պատասխան միջոց է Ուկրաինայի կողմից պատժամիջոցային սահմանափակումներին: Ստորագրվել է համապատասխան բանաձև»,- իր թվիթերյան էջում գրել է վարչապետ Դմիտրի Մեդվեդևը:

Հրապարակված փաստաթղթում նշված ցանկում սննդամթերքից ընդգրկվել են հացահատիկը, ձուկը և թառափի խավիարը, շոկոլադը, հացը, հրուշակեղենը, մրգեր, բանջարեղեն, ընդեղեն, ջեմը, գարեջուրը, գինին և այլ ոգելից ըմպելիքներ:

Բացի այդ, Ռուսաստանն արգելել է ուկրաինական լվացող միջոցների, պաստառների, գյուղատնտեսական սարքավորումների, ինչպես նաև մանկական տակդիրների ներկրումը:

Նմանատիպ գրառումներ