Պաշտոնական

Արտագնա աշխատանքի մեկնածների եկամուտը հարկելու որեւէ նախագիծ կամ գաղափար չկա. ՊԵԿ նախագահի հավելյալ պարզաբանումը

«Կարծում եմ, որ, այնուամենայնիվ, լրացուցիչ պարզաբանման կարիք կա, քանի որ ՊԵԿ տարբեր պաշտոնատար անձանց կողմից արտահայտված տեսակետների միջև մամուլում փորձ է արվում հակասություններ փնտրել (իսկ այդպիսիք, բնականաբար, չկան)»։

Այսպիսի գրառում է իր ֆեյսբուքյան էջում արել ՊԵկ նախագահ Դավիթ Անանյանը՝ անդրադառնալով մամուլում լայն տարածում գտած լուրերին, թե արտագնա աշխատանքի մեկնածներն ու դրսից գումար ուղարկող մարդիկ իրենց եկամուտից հարկեր են վճարելու:

«Երբ ճեպազրույցի ժամանակ մեր գործընկեր-լրագրողներին ներկայացվում է համատարած եկամուտների հայտարարագրման գործընթացում մեր հայրենակիցների արտագնա աշխատանքի դիմաց ստացված եկամուտները ևս հայտարարագրելու մասին տեսակետ (որը դեռ լրացուցիչ քննարկման կարիք ունի), դա ամենևին չի նշանակում, որ այդ եկամուտները ենթակա են հարկման, քանի որ հայտարարագրելը դեռևս չի նշանակում հարկել։ Ինչ վերաբերում է արտագնա աշխատանքի դիմաց ստացված եկամուտները եկամտային հարկով հարկելու իրավական պարտականություններին, ապա անհրաժեշտ է նշել, որ այս պահին գործող օրենսդրությամբ ևս առկա է պարտադիր հայտարարագրման իրավական նորմ՝ այն դեպքում, երբ եկամուտներ ստացող մեր հայրենակիցները եկամտային հարկի կիրառման իմաստով հանդիսանում են ռեզիդենտ։

Ամեն դեպքում, անհրաժեշտ է հաշվի առնել, որ եկամուտների համատարած հայտարարագրման իրավակարգավորումների վերաբերյալ որևէ կոնկրետ նախագիծ ներկայումս առկա չէ, իսկ մամուլում շահարկվող բազմաթիվ հարցականներ, կարծում եմ, որ իրենց վերջնական պատասխաններն ու լուծումները կստանան հանրային քննարկումների ժամանակ»,-գրել է Անանյանը։

Իսկ ՊԵկ կայքում տեղ գտած տեղեկատվության համաձայն, Ֆիզիակական անձանց համատարած հայտարարագրման թեման լայնորեն քննարկվում է ԶԼՄ-ներում և սոցիալական ցանցերում: Պետական եկամուտների կոմիտեն անհրաժեշտ է համարում տեղեկացնել, որ նախքան նախագծի ներդրումն՝ այն պետք է դրվի հանրային լայն քննարկման, ինչի ընթացքում վեր կհանվեն խնդրի դրական և բացասական կողմերը:

Ինչ վերաբերում է արտագնա աշխատանքի մեկնած քաղաքացիների եկամուտների հարկման մեխանիզմին, ապա որևէ նման նախագիծ կամ գաղափար առկա չէ: Իսկ ԶԼՄ-ին տված հարցազրույցում ՊԵԿ նախագահի պատասխանը բխել է ռեզիդենտների ստացած եկամուտների հարկման ընդհանուր սկզբունքներից (ՀՀ և արտասահմանյան աղբյուրներից ստացված եկամուտներ), սակայն դա չի նշանակում, որ նրանց եկամուտները ենթակա են լինելու հարկման կամ նման նախագիծ է քննարկվում:

Առնչվող Հոդվածներ